ރާއްޖޭގެ އެކި ކަންކޮޅުތަކުގައި ކުރިއަށްދާ ހައުސިންގ މަޝްރޫޢުތަކުގެ ބޮޑު އިންސައްތައެއް 2028 ވަނަ އަހަރުގެ މެދާ ހިސާބަށް ދާއިރު ނިންމާލެވޭނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ރައީސް ވިދާޅުވީ، މި ސަރުކާރުގެ އަމާޒަކީ މި ހިނގާ ރިޔާސީ ދައުރުގެ ތެރޭގައި ހައުސިންގ މަޝްރޫޢުތައް އެއްކޮށް ނިންމާލުން ކަމަށެވެ. މީގެކުރިން އެއްވެސް ސަރުކާރަކަށް އެ ދައުރެއްގެ ތެރޭގައި ފެށި ހައުސިންގ މަޝްރޫޢެއް ނިންމާލެވިފައި ނުވާކަން ފާހަގަކުރައްވަމުން، ރައީސް ވިދާޅުވީ އެމަނިކުފާނުގެ އަމާޒަކީ އެ އާދަ ބަދަލުކޮށްލުން ކަމަށެވެ. އެގޮތުން ބައެއް ރަށްރަށުގެ ހައުސިންގ މަސައްކަތްތައް އަންނަ އަހަރުގެ ތެރޭގައި އެއްކޮށް ނިމޭނެ ކަމަށްވެސް ވިދާޅުވިއެވެ.
ބޭރުގެ އެހީތެރިކަމާއި އައު ފައިނޭންސިންގ މޮޑެލްތައް
ރާއްޖެއާ ގާތް ގުޅުމެއް ބާއްވާ ގައުމުތައް ކަމަށްވާ އިންޑިއާ އަދި ޗައިނާ ސަރުކާރާ ގުޅިގެން އިތުރު ހައުސިންގ މަޝްރޫޢުތަކެއް ފެށުމަށް ތައްޔާރުވަމުންދާކަން ރައީސް ހާމަކުރެއްވިއެވެ. އަދި މި ސަރުކާރު ވެރިކަމަށް އައިއިރު އެކި ރަށްރަށުގައި ހުއްޓިފައި ހުރި މަޝްރޫޢުތައް އަލުން ފަށައިގެން ކުރިއަށްދާ ކަމަށާއި، އައު ފައިނޭންސިންގ މޮޑެލްތަކާއެކު އިތުރު މަޝްރޫޢުތަކެއްގެ މަސައްކަތް ކުރިއަށްދާކަން އެމަނިކުފާނު ފާހަގަކުރެއްވިއެވެ.
”އަމަލީ ގޮތުން ފްލެޓް އެޅުމުގައި މި އަހަރު ތެރޭގައި އިތުރު ކުރިއެރުންތައް ފެނިގެންދާނެ.“ ރައީސް ވިދާޅުވިއެވެ.
ބީއެމްއެލް ފައިނޭންސްގެ ދަށުން ހިންގާ މަޝްރޫއުތައް
ބޭންކް އޮފް މޯލްޑިވްސް (ބީއެމްއެލް) ގެ ފައިނޭންސްގެ ދަށުން ރާއްޖޭގެ 13 ރަށެއްގައި ހިންގާ ހައުސިންގ މަޝްރޫޢުތަކަށް ބޭނުންވާ އެޑްވާންސް ފައިސާ މިހާރު ހަމަޖައްސާދީފައިވާ ކަމަށާއި، ވަރަށް އަވަހަށް އަމަލީ މަސައްކަތް ފެށޭނެ ކަމަށް ރައީސް ވިދާޅުވިއެވެ. މީގެއިތުރުން ހުޅުމާލެ އާއި ވިލިމާލޭގައި ބިންގާ އަޅާފައިވާ މަޝްރޫޢުތަކުގެ އަމަލީ މަސައްކަތް އަންނަ މަހު ފެށިގެންދާނެއެވެ.
އަތޮޅުތެރޭގެ އެންމެ ބޮޑު މަޝްރޫއު ކުޅުދުއްފުއްޓަށް
އަތޮޅުތެރޭގެ ރަށްރަށަށް ބަލާއިރު، ހައުސިންގގެ އެންމެ ބޮޑު މަޝްރޫޢެއް ކުރިއަށްދަނީ ކުޅުދުއްފުށީ ސިޓީގައެވެ. އެ ސިޓީގައި އެޅުމަށް ހަމަޖެހިފައިވާ 400 ހައުސިންގ ޔުނިޓުގެ އެގްރީމެންޓް އެކުލަވާލުމުގެ ފަހުގެ މަރުހަލާ މި ހަފްތާގެ ތެރޭގައި ނިމޭނެ ކަމަށް ރައީސް ވިދާޅުވިއެވެ.
ނިންމަވާލައްވަމުން ރައީސުލްޖުމްހޫރިއްޔާ ވިދާޅުވީ، ރައްޔިތުންނަށް ވެވަޑައިގެންފައިވާ ގޯއްޗާއި ގެދޮރުގެ ވައުދުތައް ފުއްދަވާނެ ކަމުގެ ފުރިހަމަ ޔަގީންކަން އެބައޮތް ކަމަށެވެ. އަދި ސަރުކާރުން ކުރަމުންދާ މަސައްކަތްތަކާއެކު ހައުސިންގ ދާއިރާއިން އާންމުންނަށް އިތުރު ފުރުސަތުތައް ހުޅުވިގެންދާނެ ކަމުގެ އުންމީދު ބޮޑު ކަމަށްވެސް ރައީސް ވިދާޅުވިއެވެ.
