ސަރުކާރުން ކުރިއަށްގެންދާ ބޯހިޔާވަހިކަމުގެ މަޝްރޫޢަކީ އެއްވެސް ފަރާތެއްގެ ނުފޫޒެއް ނެތި، އިންސާފުވެރިކަމާއެކު ކުރިއަށްދާނެ މަޝްރޫޢެއްކަމުގެ ޔަޤީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވައިފިއެވެ.
”ބޯހިޔާވަހިކަން އެންމެނަށް“ ސިޔާސަތުގެ ދަށުން ބޯހިޔާވަހިކަމަށް އެދި ހުށަހެޅި ފަރާތްތަކުގެ ފޯމުތައް ކަށަވަރުކުރުމުގެ (ކްރޮސް ވެރިފިކޭޝަން) މަސައްކަތް ހައުސިންގ މިނިސްޓްރީން މިހާރު ވަނީ ފަށާފައެވެ. މި ސްކީމަށް ބައިލައްކައަށްވުރެ ގިނަ އެޕްލިކޭޝަން ލިބިފައިވާއިރު، އޭގެ ތެރޭގައި ހިމެނެނީ:
- ފްލެޓަށް އެދި: 35،900 އަށްވުރެ ގިނަ ފޯމު
- ގޯއްޗަށް އެދި: 22،000 އަށްވުރެ ގިނަ ފޯމު
ޕީއެސްއެމްގެ ”ނޭޝަން ޗެޓް“ ޕްރޮގްރާމްގައި ވާހަކަދައްކަވަމުން ރައީސް ވިދާޅުވީ، މާޒީގައި ނުފޫޒުގަދަ ފަރާތްތަކުން ބޭނުންވާ ބަޔަކަށް ގޯއްޗާއި ފްލެޓް ދިން އުސޫލު މި ސަރުކާރުން ނައްތާލާނެ ކަމަށެވެ. އަދި ބޯހިޔާވަހިކަމަކީ އަސާސީ ޒަރޫރީ ބޭނުމަކަށްވާއިރު، ވަކި މީހަކަށް ނުވަތަ އާއިލާއަކަށް ނާޖާއިޒު އިސްކަމެއް ދިނުމުގެ ފުރުޞަތެއް މިފަހަރު ނޯންނާނެކަމަށް ރައީސް ވިދާޅުވިއެވެ. މީގެއިތުރުން، ފޯމުތައް ވެރިފައިކުރާ މުވައްޒަފުންވެސް އެއްވެސް ނުފޫޒެއް ނެތި އިންސާފުން މަސައްކަތް ކުރާނެކަމުގެ އިތުބާރު އެބައޮތްކަމަށް ރައީސް ވިދާޅުވިއެވެ.
ކުރީގެ ސަރުކާރުތަކުން ދައުރު ނިމެން ކައިރިވުމުން ހައުސިންގއަށް ހުޅުވާލުމުގެ ސަބަބުން ރައްޔިތުންނަށް ގިނަ ޝަކުވާތަކަކާއި، ދެން އަންނަ ސަރުކާރުތަކަށް ބޮޑެތި ތަކުލީފުތަކެއް ކުރިމަތިވެއެވެ. ނަމަވެސް، މިފަހަރު ސަރުކާރުން ވަނީ ދުރާލައި ހައުސިންގއަށް ހުޅުވާލާފައެވެ. ސަރުކާރުން ހާމަކުރެއްވި ގޮތުގައި މިއަހަރުގެ ތެރޭގައި މަޝްރޫޢުތަކުގެ ޢަމަލީ މަސައްކަތް ފަށައި، ކުރިއަށް އޮތް 2 އަހަރު ދުވަހުގެ ތެރޭގައި މަސައްކަތް ނިންމައި، އާންމުންނަށް ވަގުތުން ވަދެވޭނެ އިންތިޒާމު ހަމަޖައްސާނެއެވެ.
